Prishtina shkel maqedonasit e Kozhuvit (FOTO)

Sigal Prishtina e ka shkatërruar skuadrën maqedonase ‘Kozhuv’ duke e mposhtur me epërsi të lartë prej 24 pikëve, 85-61, që ngjasoi me një stërvitje rutinore të Bardhekaltërve.

 Salla e mbushur me afro 2500 tifozë i dha kësaj ndeshje edhe më shumë hijeshi, teksa Plisat dhuruan një atmosferë impozante gjatë tërë takimit për t’i dhënë një shembull të mirë zyrtarëve të lartë të FIBA-s që ishin të pranishëm.

Mysafirët e nisën lojën me një seri 0-5, mirëpo kjo gjë vetëm se i ndezi edhe më shumë Bardhekaltërit, të cilët e përmbysën këtë epërsi përmes tandemit Dardan Berisha-Edin Bavcic, të cilët me aksionet e tyre i siguruan Prishtinës një epërsi prej 12 pikëve në përmbyllje të kësaj periudhe, 24-12.

Në çerekun e dytë loja e Prishtinës u zbeh paksa për shkak të shumë topave të humbur në sulm, mirëpo trajneri Ilievski bëri disa ndryshime taktike që dolën të jenë të qëlluara, pasi që Bardhekaltërit e ngritën epërsinë e tyre në 16 pikë(41-25), në fund të pjesës së parë.

Çereku i tretë ishte monumental për Bardhekaltërit, të cilët thjeshtë i shkelën kundërshtarët si me lojë ashtu edhe me rezultat(70-39), ndërsa Dardan Berisha u përkujdes për atmosferën në sallë me trepikëshat e tij të zjarrtë.

Cereku i fundit u zhvillua vetëm sa për hir të protokollit sepse ndeshja veç kishte përfunduar më herët pas epërsisë së lartë të bardhekaltërve, ndërsa rezultati përfundimtar i takimi ishte 85-61.

Më i dalluari në këtë ndeshje ishte Edin Bavcic me double-double (25 pikë e 12 kërcime), ndërsa kontribut të madh dha edhe Dardan Berisha me 17 pikë, 9 kërcime dhe 6 asistime.

Ndeshja e dytë gjysmëfinale, do të zhvillohet me 8 prill në Maqedoni. 

Shperndaje në Google Plus

About Admin

www.shqip-risi.blogspot.com